Samarqand shaxridan taxminan 25 kilometr uzoqlikdagi Hartang qishlog‘ida joylashgan Imom al-Buxoriy majmuasi bugungi kunda to‘liq yangilangan holda ziyoratchilar, turistlar va mahalliy aholi tashrifi uchun ochildi.
Ushbu yirik loyiha doirasida 48 ming kvadrat metrdan ortiq hudud to‘liq rekonstruksiya qilindi. Majmua tarkibiga Imom al-Buxoriy maqbarasi, keng ziyorat hududi, bir nechta masjid va namozgohlar, zamonaviy infratuzilma, shuningdek 4400 kvadrat metr maydonni egallagan landshaft bog‘lari kiritilgan.
Kompleksning markaziy jome masjidi bir vaqtning o‘zida 9 000 dan ortiq namozxonni qabul qilish imkoniyatiga ega. Majmua yil davomida 5 milliongacha ziyoratchini qabul qilish quvvati bilan barpo etilgan bo‘lib, bu uni Markaziy Osiyodagi eng yirik ziyorat maskanlaridan biriga aylantiradi.
Shuningdek, hududda ziyoratchilar uchun barcha sharoitlarga ega halol tamoyillari asosida qurilgan mehmonxonalar, dam olish zonalari va keng piyodalar yo‘laklari tashkil etilgan.
Imom al-Buxoriyning boy ilmiy va ma’naviy merosini aks ettiruvchi ushbu majmua nafaqat diniy ziyoratgoh, balki Samarqandning muhim madaniy va turistik markazlaridan biri sifatida ham e’tirof etilmoqda.
