Silk Road Samarkand kompleksi hududida umumiy maydoni 28 ming kv.m. bo‘lgan ulkan kongress markazi joylashgan. Bino sharqona uslubda qurilgan bo‘lib, katta panoramali derazalarga ega. Zamonaviy jihozlar bilan jihozlangan yuqori texnologiyali maydon kongress, konferensiya, simpozium, ko‘rgazma, taqdimot, shou va banketlar o‘tkazish uchun mo‘ljallangan. Mehmonlarni keng maydonlar, zamonaviy dizayn va tajribali hodimlar xizmatlari kutmoqda. Atrofida Samarqanddagi eng yaxshi mehmonxonalar – Samarkand Regency Amir Temur va Silk Road by Minyoun joylashgani hisobiga kongress markazida xalqaro tadbirlarni o‘tkazish imkoni bor.
Kongress markazida 13 ta konferensiya zallari va majlislar zali mavjud bo‘lib, ular Buyuk Ipak yo‘li davrida alohida qadrlangan qimmatbaho va yarim qimmatbaho toshlar sharafiga nom olgan. Zallarga tutash hududlarda kofe-breyk va furshetlar tashkil qilish mumkin.
